02/03/2017

知識可以改變命運

*第29日*

--- 第七次見醫生---

「妳用緊嗰枝... 有類固醇(越講越細聲,好似想收番啱啱講完既幾個字)... 白色樽嗰枝眼藥水,用咗之後有冇好啲?」

剛被轉介至(眼)角膜專科醫生,第一次會面,他問我。

「哦......嗰枝steroid呀~  都好咗啲啲既,但係隻眼睇嘢,都仲係未清喎。」

檢查完畢,醫生想了一分鐘。

「我開枝勁少少既藥俾妳,用一個星期,返嚟覆診,再睇吓點啦!」

我問:「勁少少,又係steroid呀,咁又有咩SIDE EFFECT呀?」

本來在寫診斷報告的醫生回頭望著我,說:「嗱,真係...真係...好長遠,而又講緊連續用好耐呀,係有可能導致青光眼。」

「吓?點解會有人無端端用steroid用咁耐呀?唔係啩......」

「唔係個個都好似妳咁,識得問,有啲公公婆婆,唔知係咩,諗住滴吓滴吓,又幾好喎,咪當咗普通眼藥水咁用,然後用完,仲攞住出去藥房買,咪KEEP住滴囉......」

「噢!」

可能醫生見我好專心聽,他續說:「仲有啲阿媽,帶啲小朋友嚟睇,雖然開咗啲唔係好勁既,但係佢哋見個小朋友,滴完好咗,又唔返嚟覆診。之後,出咗事,先帶佢返嚟睇,原來佢以為嗰枝眼藥水可以滴完又滴,又係咁囉,去醫房買,KEEP住滴,咁個小朋友咪慢慢變咗有青光眼......真係咩人都有,唔係個個好似妳咁,都叫做識得問吖......」

「咁點解藥房會有得賣啲藥呀?我以為啲steroid係一定要prescription。」

我說罷,這次到醫生旁邊的護士望著我,然後說:「藥房其實都唔應該賣"丸仔"啦,咪又係有得買!?」

「噢!明白晒!」

--- 就是跟這醫生與護士的一席話,我明白何謂「知識改變命運」。

其實,我「識問」是因為自己對於任何藥物都存有「偏見」,尤其類固醇,總覺得必定有些存在風險,所以要知清楚,以防身體有甚麼反應變化,也有些心理準備,而我認為「識問」是種「common sense」,但原來並非人人有。回想起來,我看是自己畢竟讀中學的時候,讀過生物科(Biology)和化學科(Chemistry),曾經吸收過的知識於不知不覺間融入了生活當中,所以那刻聽到醫生的話,我便不期然想起問題。

若然我從來未曾接觸過生物科,又不知道何為類固醇,亦不知道有些藥物可能帶來副作用,我便不會向醫生查詢,而更有可能的是,我的個案就可能變成醫生提到的個案。如果那些公公婆婆或父母是有點知識之士,他們自己與孩子們的命運很可能會不一樣的。

後記:六年前的二月,原來我同樣遇過眼毛病...

更多資料:關於青光眼

No comments:

Post a comment