（接續）
魚。恐龍知道那是一尾魚，只不過......以前見過的，都是大魚，是恐龍捕捉得到的。前眼的呢？魚呀，是魚的外形，可是，對恐龍來說，這尾魚小得可憐，跟自己的一隻手指般長而已！想過捕捉牠，但聰明的恐龍，知道自己是捉不到牠的，抓下去，小小的魚是可以在自己指間溜掉的。算吧！
「魚，你咁細條，點會游到嚟呢度呀？你叫咩名呀？」
「我叫沙甸魚呀！我知你係恐龍，我聽過啲大魚哥哥講，你喺水邊踩一腳，就搞到個海地震咁，然後你再走出啲，睇佢哋集中喺邊度，一手插入水，就會捉到佢哋！」
「係咩？我咁出名咩？」
（魚心想：「出名又好，惡名遠播又好啦！」）
「係呀！我就係想嚟見吓你，所以咪游嚟呢度囉。其實，我喺好遠嚟，一路上，我見到啲魚朋友都叫我唔好嚟呀，佢哋話你好可怕喎！不過，我唔驚呀，我身形咁細，我唔覺得你可以對我點樣！反而，我覺得會好安全！如果唔對路，咪走囉，但係如果可以見吓你，傾幾句，咪可以多個"異類"朋友囉！」
「你話喺好遠嚟，咁即係邊度呀？有幾遠呀？」
「隔離個島囉！不過，雖然話係"隔離"，但我咁細條，要游成日先嚟到呀！我今朝一早出發，家吓都幾乎黃昏啦！你咁巨型，我諗你游過去，爬幾爬，就到啦！我諗兩個鐘，應該得。」
（恐龍心想：喺呢個島走吓，行吓，去湖邊玩水，玩兩個鐘就得！離開呢個島，游出去，仲要游兩個鐘？點可能呀？）
「你都好勇敢吖！歡迎你嚟到我哋呢個恐龍島！」
「多謝你！好高興認識你，恐龍！我要走喇，要返去喇！」
「咁快呀！留多一陣，講吓你嗰邊個島既嘢俾我聽，得唔得呀？」
「我要走喇！再遲啲，會有逆向既水流出現，咁我就要再游耐啲，有排都返唔到去。」
「但係你游咗咁耐先嚟到，唔留多一陣，好可惜喎！」
「唔係吖！至少，我一嚟到，就見到你！我一心嚟見吓你咋嘛！不如你下次過嚟，你游兩個鐘，一定到。我一陣掉頭游，你望住我游去個方向，你跟住一直游，就到喇，包你唔會迷路！」
「但係......HMMMM......」
正當恐龍想說出牠有點怕的心情，忽然眼前有個影掠過，然後咀邊有點涼的感覺，接著，牠聽到撲通一聲，「BYE BYE，後會有期！」。
恐龍看看水裡面，只見沙甸魚的身影遠去...... 那一秒，恐龍才發現，原來剛剛是沙甸魚跳上來，給了自己一個吻！
恐龍向前行了兩步，想追在沙甸魚的後面，但沙甸魚細小的魚影，早就消失了，加上天開始黑，恐龍就更加害怕，再走出去，要是找不到沙甸魚的影踪，自己迷路，怎麼辦？結果，走出了兩步，竟退後三步來。最後，天黑了，恐龍就只有望著黑漆漆的水面，想著沙甸魚和牠的話......
往後的幾個白天，恐龍都會踱步走到海邊，不是想沙甸魚會否再來，就是想自己能否游出去，找到魚和那個島。然而，最後，恐龍還是沒有再見到沙甸魚，也沒曾游過出去，離開過自己身處的恐龍島。
那一吻，成了吻別的吻，也成了恐龍年復一年都在想的吻；而沙甸魚所說的島，恐龍這一輩子也不知道是怎樣的一個島，也不知道實際上，那個島有多遠，牠知道的就只有是「去那個島，要游兩個鐘，我應該游唔到去......」。
兩小時的距離，結果成了一輩子的距離。
No comments:
Post a Comment